وأكيد خصوصاً لو الناس دى بتحبهم وتحب إنهم يكونوا جانبك،

وعشان تكسب قلوب الناس معاك وفى صفك هقولك على كام نقطة كده مهمة..


الناس مبتحبش التشتت ولا الشخصية المشتتة،

يعنى لو حاولت تكسب كل الناس فتبدأ تغير فى شخصيتك وطريقتك على حسب الشخص، يبقى مش هتوصل لأى حد منهم،

و ممكن تكتسب احترامهم على المدى القصير لكن مش هتعرف تكون صداقات على المدى البعيد.

فى ناس بتفتكر مثلاً انها لما تقول نعم و اه علطول ومترفضش لغيرها طلب انها كده هتبقى محبوبة،

لكن ده بيأدى بيها انها بتبقى عاملة زى المية اللى ملهاش شكل ومتعرفش تمسكها،

وطبعاً اه علطول دى بتضعف شخصيتك عموماً وضعف شخصيتك هتأثر على علاقتك بالناس

لازم تكون جواك عارف انت مين وعاوز إيه،

وإيه هى مبادئك و قيمك ،

ومتغيرهاش لأى سبب و فى أى ظرف،

وعلى الرغم انك ممكن تخسر شوية ناس لكن فى الغالب هتجذب ليك ناس كتير،

جزء منهم الناس اللى متوافقة مع مبادئك وقيمك دى،

وفئة تانية مش متوافقة معاك بس بتحبك وبتحترمك عشان انت ليك شخصية وعندك ثقة فى نفسك وفى مبادئك..


خد دى بقى

سواء داخل على واحد متعرفوش او تعرفه متنساش الابتسامة،

والابتسامة دى حل سحرى لكتير جداً من المواقف،

فهى بتوحى لأى حد بإنك انسان ودود وكمان واثق من نفسه (حتى لو بتشتغل اللى قدامك)،

ومن ناحية تانية ليها تأثير السحر على شخصيتك ومزاجك وبتشيل أى توتر أو حالة غضب عندك،

يعنى عمرك شفت حد بيبتسم وغضبان فى نفس الوقت؟!

افتكر أسامى الناس وكلمهم بيها،

وياسلام بقى لو ليهم ألقاب حاول تستخدمها،

متتخيلش الموضوع ده بيبفرق مع الناس ازاى،

يعنى مثلاً وانت جاى تحكى لواحد حاجة فبدل ما تقوله "انا الموضوع ده مضايقنى" ،

جرب تقول "عارف يا فلان .. الموضوع ده مضايقنى"

الناس بتحب اسمائها اكتر اسم و اسم الشخص هو اكتر كلمة بينتبه ليها،

وكمان لو في لقب معين بيحب يسمعه زى مثلاً دكتور كذا لو هو فى صيدلة او طب وياباشمهندس كذا لو فى هندسة، وهكذا.

وياريت متقولهاش نفاق او بسماجة ..

قولها بحب عشان توصل صح..

و حافظ عليها خصوصاً لما تبقى فى اجتماع رسمى أو شبه رسمى،

أو بتعرّفه على حد جديد..

فى حاجة كمان خلى بالك منها

لما تكون بتكلم مجموعة سواء صحابك او زمايلك او ناس فى اجتماع،

حاول تحسس كل واحد فيهم انه اهم واحد،

يعنى متفضلش تعلق على واحد بس و تقرطس الباقى،

خلى بالك من نظراتك،

فكلم كل واحد مثلاً عدد معين من الثوانى بصّله وكلمه كأنه اهم واحد فى القعدة،

و بعد كده اتنقل للى بعده واللى بعده،

وده بيضمن ان كله بيبقى مهتم باللى بتقوله،

و على المستوى البعيد بيحصل زى كيميا كده بينك وبينهم..


فى نقطة بقى مهمة

خلّى بالك من الالفاظ اوى،

يعنى متبقاش مدبّ (زى المدفع كده)،

فى ناس بتبقى طيبة اوى وطيبتها دى مخلياها عاملة زى المدفع،

بتضرب اى كلمة فى اى وقت وفى اى مكان،

و الكلمة لو خرجت غلط طبعاً صعب تصلحها ومهما حاولت تبين نيتك الحلوة بيبقى الموضوع صعب شوية يرجع زى الاول،

وعشان انت عارف ان الكلمة مهمة فحافظ على الكلمات الرومانسية النادرة

زى

"شكراً"،

"معلش"

(اللى هى بتتكتب معلهش فى قصص فلاش وسماش)..


خلى بالك بقى ان الصداقة او الزمالة او العلاقة عموماً بين الناس شبه الرصيد فى البنك،

كل شوية عمّال يا بتسحب منه يا بتزوده..

عشان كده حاول تزوّد الرصيد ده باستمرار بمواقفك الجدعة،

وكلامك الحلو،

وعشان كده لو كنت بتحب حد روح قولّه انك بتحبه،

ودى كانت نصيحة النبى الكريم عليه الصلاة والسلام،

وبالتالى لو حصل مرة موقف ندالة منك ولاّ حاجة هيفتكرلك الكلمة دى وهيتجاوز عن الموقف،

بس ياريت متستحلاش الندالة بقى devil

يعنى ملخص الموضوع ده كله،

انك تنمى شخصيتك وتحافظ على قيمك ومبادئك،

خليك شيك فى الفاظك وكلامك،

وابتسم فى وشّ الناس

اكيد الناس هتحبك وتحترمك

هو كلام مفيد جدا عمتا
بس مش كل الناس هعاملها حسبها هى عاوزه ايه منى
لا انا شخصيتى هتكون واحده الطيبه حترام الاخرين اللباقه فى الكلام مع اى حد
ودا بردوا فى صلب الاحترام

والطيبه الزياده فى ناس كدا الى ع قلبها ع لسنها بس عمرها مش هتعرف تغير نفسها علشان ترضى حد او تكسبه

الى يحبنى ع حالى احبه مش علشان اكسب ثقته واحترام حد اغير مبدئ وحياتى علشان خاطره

دا من وجهه نظرى ان الشخصيه واحده مهما عملت مش هعرف اغيرها علشان اكسب حد

انما من ناحيه ان مثلا الشخصيه تكون وحشه ووحيد بين الناس لا دا من حقه يغيرها علشان يعرف يتقلم مع الناس

انما بنسبه لا عمرى ما هغير شخصيتى علشان خاطر حد

هههههههههههه وجهه نظرى فقط

موضوع كويس جدا يا بسوم

ثانكس علي مرورك يا كبييييييييييييييييييييييييرة

وبرده رايك متقبله وبحترمه....................

بس انا اقصد ان الواحد لازم يعرف يتعامل مع كذا نمط من انماط الشخصيات عشان يعرف يعيش في الزمن ده ويعرف يتعامل مع الناس وده مع الاحتفاظ ببعض المبادئ والقيم والمعايير والاخلاق طبعا

متشكره جدا يا كبيييييييييييييييييير


انا فهمت وجهة نظرك ااذا كانت كدا ماشى


بس عن نفسى بعرف اعامل كل الناس بطريقه تخليهم يحتاروا يعملونى ازاى
هههههههه

لانهم هيلاقوا كلا الى عاوزينه احترام وادب والباقى هههههههههه