السلام عليكم ورحمة الله وبركاته


انا النهاردة كنت بتكلم مع واحدة صاحبتى
هى عايزة تلبس الخمار
لكن للأسف خايفة من كلام الناس
يعنى الكلام المعتاد زى مثلا
شكلك وحش بالخمار
مش هتتخطبى سعيدة قوي
على اساس ان الطرحة القصيرة هى اللى بتزغلل عين العريس دايخة
وتجره لبيتهم علشان يخطبها
هههههههههههههههههههههه


بجد الناس ليها كلام غريييييييب
ولو كل واحد فينا اهتم بكلام الناس يبقى مش هنخلص والدنيا مش هتمشى
لان بكل بساطة الناس مش بيعجبها اي حاجة


انا مثلا شبعت كلالالالالام من الناس

(ودى حكايتى مع كلام الناس)

انا الحمد لله بابا وماما متدينين

لما كنت صغيرة ماما كانت بتلبسنى لبس عادى
لبس الاطفال العادى ممكن حاجات كت بس مش حمالة
وممكن جيبات و شورتات جينز بس بتكون للركبة مش اقصر من كدا

لما كنت بلبس كدا الناس اول ما يشوفونى
مش وراهم غير كلمة واحدة على لسانهم

ايه ده بنت الشيخ لابسه كدا ؟؟؟؟؟

بجد الكلمة دى كانت بتضايقنى فى الاول
لانى كنت صغيرة ساعتها مش فاهمه حاجة
غير انهم كدا بيغلطوا فى بابا

كبرت والحمد لله اول ما بلغت لبست الخمار
كالعادة كلام الناس مش بيخلص

اول ما يشوفونى
ايييييييه اللى انتى عملاه فى نفسك ده
ليه كبرتى نفسك متعيشى حياتك
على اساس ان الخمار هيخلينى قاعدة ميتة
هههههههههههههههههه

واكتر سؤال كان بينرفزنى بجد هو
ابوكى وامك هما اللى غصبوا عليكى تلبسيه صح ؟؟؟
كنت بكره السؤال ده بشكل
ارد عليهم واقولهم لأ انا اللى عايزة البسه
يردوا ويقولوا بس اكيد ابوكى هو اللى فرضوا عليكى

هههههههههههههههههههههه
بجد كلام الناس ملهوش حل

ويا سلام بقى لما اجى اسلم على واحدة
والاقيها بتصرخ فى وشى
فيه ايه يا جماعة
الاقيها بتقولى ايه ده انتى لبستى الخمار امتى حرام عليكى

لا حول ولا قوة الا بالله
حسستنى انى لابسه مايوه

وماما شبعت طبعا معايا من الكلام ده
انتى ايه اللى عملاه فى بناتك ده
حرام عليكى خليهم يعيشوا حياتهم
على اساس ان ماما بتخنقنا ولا بتفطسنا
ههههههههههههههههههههههه



بصراحة مكدبش عليكم انا فى الاول كنت بضايق قوى من كلام الناس
لدرجة ان كان ممكن ارجع البيت اقعد اعيط
وببقى مضايقة قوى انى اتولدت فى مجتمع زى ده
وفى اوقات كنت بتمنى ان بابا يسفرنا نعيش فى السعودية
لانهم هناك معظمهم لابس خمار ونقاب
يعنى محدش هيتريق على لبسى ولا على احتشامى وحجابى


لكن بعد ما كبرت الحمد لله
كلام الناس اصبح ملهوش ايييييي اهمية بالنسبة ليا

اهم حاجة ارضى ربى وامى وابى

وانا دلوقتى الحمد لله لبست النقاب
وبردوا سمعت كلمات كتيييييير من الناس
بس عمرى ما زعلت ولا اتأثرت بيها
العكس الكلمات دى كانت بتثبتنى اكتر


انا حكيتلكم قصتى
علشان اقول لكل واحدة
اوعى تسمعى لكلام الناس
خلى كل همك هى طاعة ربك
كلام الناس هو اللى بيضيعنا
الناس مش بيعجبها اى حاجة

لو لبستى نقاب هيتريقوا عليكى ويتكلموا
ولو لبستى بدى وبنطلون محذق بردوا هيتريقوا ويتكلموا

يبقى المفروض احنا نخلى همنا كله فى رضا الله سبحانه وتعالى
وليس فى رضى البشر