للدنيا فى الناس حركات

بتحب الرقص ع السلم ...

رقص السراب ف عنيك

ياللى بتلوي في دراع الأمل

وانت النهار مش ليك

الدنيا بترقص ع السلم

بتخلي عنيا تزغلل ...

أتكعبل

وتشيلنى من غير ما تسمى

وتسيبنى مبعتر بين دمى ...... ودمى

************

طير الهزيمة شرب من نهر شريانى

لا فضلت فى أول شط ... ولا رحت للتانى

شايف النهار جاى من بعيد منهار

مغروز فى ضهره ألف سكينة غروب

الشمس بتخونك مع ألف ليل وهروب

ما هى لما تضحك لك فى حضن ليل ...

بتدوب

************

وانت ... متباع لمين ؟؟

دم السنين أهو راح بلاش

القلب عاش مطرح ما عاش أهو راح ......

مكتوب عليك أحسن ما تلبس .... كفن

أعلى ما تسكن .... تراب

أجمل ما تحيا .... ممات

للدنيا فى الناس حركات


نقطه ومن أول السطر


الشمس تبدأ فى الغروب

لكن غروبها مش هروب

ونورها لسه فى القمر

ورق الخريف .. لا بد ويسيب الشجر

لكن نزوله مش خلاص

لأنه فيه بعديه ورق ... أخضر جميل

يروح يميل ... فوق الفروع

فروعه ثابتة ... ومستحيل

فروع تميل رغم الرياح

يومنا ليل .. وليه نهار

مش معنى ليل يعنى انهيار

لأن ليلنا فيه قمر

سهران ينور للسهر

تفضل حياتنا كالشجر

تدبل تروح بس المطر ...

يخلى غيرها يتولد

وسط الدموع والألم

الفرحه لازم تتولد