السلام عليكم ورحمة الله وبركاته

بصراحة الموضوع دا عجبنى جدا وحبيت تشاركونى فيه

انا لاحظت بنات كتير بتقول انا الحمد لله سبت الشخص اللي كنت
مصاحباه



بصوا يا جماعه انا عارفة ان الموضوع بجد صعب و فى مشقه فى ان الأنسان يتخلص من الشخص اللى بيحبه .... و ده لأنه اتعود انه لما يصحى يرنله و لما يخرج من البيت لازم يرن و لو دخل ينام يكلمه



و الكلام ده كله .... بس و الله لو عرفنا ان الخير هو فى ترك الشخص اللى احنا بجد حبيناه ... هنعمل كده

و بعدين يا اختى لازم يكون عندنا ثقه فى وعد الله لينا




يا جماعه احنا لما وثقنا فى الدنيا عمرنا ست قارات




و لما وثقنا فى فى ان رصيد البنوك هو المستقبل و الآمان خلينا همنا كله هو ان يكون لينا رصيد فى البنك




و لما وثقنا فى الدكتور ...بقينا نشوف الأب اللى بيدى للدكتور الفلوس و يفضل يدعيلوا و مش بعيد يساعدوا على الرغم ان الدكتور ده هو اللى هيفتح بطن ابنه و هيقطع فى لحمه




بس لأننا وثقنا فى الدكتور ... مديناش لنفسنا فرصه ان احنا نشك لمجرد لحظه فى قدراته ... و سلمنا نفسنا للدكتور لأننا استشعرنا الأمان و الطمائنينه تجاهه

ليه يا جماعه مش قادرين نثق فى وعد الله لينا ... ليه مش قادرين ندى نفسنا فرصه نحب ربنا بجد ... ليه خلينا رضى الناس و السعى وراء شهواتنا هو الهم الكبير و سيبنا محبه الله



والله يا جماعه قرأت آيه هزت كيانى كله ... و رددت فى نفسى لو يعلم هذه الأيه كل شاب و فتاه ... و الله لعلموا ان السعاده الحقيقيه فى طاعه الله و البعد عن ما يغضبه سبحانه و تعالى

و الأيه دى فى سوره ابراهيم ... و هى قول الله تعالى



(وقال الشيطان لما قضي الامر ان الله وعدكم وعدالحق ووعدتكم فاخلفتكم وما كان لي عليكم من سلطان الا ان دعوتكم فاستجبتم لي فلاتلوموني ولوموا انفسكم ما انا بمصرخكم وما انتم بمصرخي اني كفرت بما اشركتمون من قبل ان الظالمين لهم عذاب اليم)


انا بس يا جماعه عاوزة أقف وقفه صغيره جدا معاكم مع الأيه دى



اول حاجه ... (و قال الشيطان ) ...



يعنى مش الداعيه الفلانى ... يعنى مش ماما ... يعنى مش صحبتى



( لما قضي الامر )



يعنى خلاص يا جماعه انتهى الأمر ... مبقاش فى كلمه يارب .. مبقاش فى توبه .... مبقاش فى حد هيقول للتانى كده حرام و كده حلال



(ان الله وعدكم وعد الحق)


هنا بقى يا جماعه عاوزين نركز شويتين فى المعنى



وعدكم الله وعد الحق :


للأسف يا جماعه احنا فقدنا الثقه فى وعود الله لينا و صدقنا وعد الشيطان



وعدنا الله جل و علا و قال



(من يتق الله يجعل له مخرجا) .... و سيبنا وعد ربنا سبحانه وتعالى ... و خفنا نسيب اللى احنا بنحبهم علشان مش واثقين ان ربنا سبحانه و تعالى هيجعل لينا مخرج



و الشيطان قال لنا



(مفيش جواز من غير صحوبيه) ...



(لو سبتيه هينساكى و هيشوف غيرك) ...

(يا بنتى انت هتعقدى نفسك ليه ما البنات معظمهم كده .. يحلها ربنا ) ...


(يا بنتى متعى نفسك و خليك معاه و لو سابك هتلاقى ميت واحد غيره ... .)


... و غيره ....... و غيره ...... و غيره



و رغم كل ده وثقنا فى وعد الشيطان لينا ... و نسينا ان الشيطان نفسه هو اللى قال فى القرآن


(ووعدتكم فاخلفتكم)



و عدتكم انكم هتتجوزا بعض و انا كنت عارف ان كل مكالمه كانت بتبعدكوا عن بعض


وعدتكم انكم هتيعشوا فى سعاده و انا كنت عارف انكم هتعيشوا فى ضنك .


وعدتكم انكم هتكونوا متسامحين مع بعض و كل حاجه بينكم هتتحل و لكن منسيتش ان اخلى حياتكم شقاء و انكم تتخانقوا مع بعض بعد الجواز و خليت اتفه المشاكل سبب فى تعاستكم .



و عدتكم ان السعاده فى مكالمه تليفون و خليتكوا تنسوا ربنا السميع العليم





و النهارده (يوم القيامه أقصد) انا جاى اقولكم الكلام ده .. بس بعد ما خلاص زى ماكنتوا معايا فى الدنيا مطيعين و بتسمعوا كلامى ... فأنا جى احسركم و اعرفكم انى من الأول كنت بضحك عليكم وبلعب بمشاعركم ... )




ايوه كنت مخليكى مبسوطه اوى وانت كل يوم بترخصى نفسك علشان واحد انا اقنعتك
انه هيكون ليكى و انه بيحبك .. لكن انا نسيت اقولك انك كل مكالمه كنت بتكلميه فيها كنتى بترخصى فى قلبه اكتر و اكتر ... و نسيت اقولك انه من كتر ما حس انك سهله و مش قادره تمنعى نفسك عنه .. كنتى انت اول واحده بره حساباته يوم ما فكر يرتبط بجد و يتجوز واحده هى فى يوم من الأيام هتكون زوجته وأم أولاده ... لكن بس حبيت اتفرج عليكم و افرح فيكم وانتوا بتغضبوا ربنا .. وانتوا عمالين بتكذبوا كلامه و وعوده ... بس خلاص انا عملت اللى انا عاوزه و قدرت العب بمشاعركم و قدرت اعذبكم و افرق بينكم ...



(وما كان لي عليكم من سلطان الا ان دعوتكم فاستجبتم لي)




و على فكره انا مضربتكمش على ايديكم .. انا كنت مضربتكيش على ايدك لما رفعتي سماعه التليفون و كلمتيه ... و انا مضربتكيش على ايديك لما خرجتى معاه و كلمتيه ... انا بس شاورتلكم و ضحكت عليكم وقولتلكم ان طريق السعاده من هنا و انتو بصراحه مكدبتوش خبر .. و جريتي تكلميه و رخصتى نفسك لواحد هو مخافش عليكى اصلا من عذاب ربنا و لكن رغبتوا فى انه يرضى شهوته منك كانت اقوى من خوفه عليكى ... و آخرتها يا مسكينه خسرتى كل حاجه ... لا انت طولتيه ولا قدرتى تعيشى حياتك مبسوطه مع غيره


ربنا يهدينا ويهدي بنات المسلمين جميعا ويرزقنا الجنه

ارجوا المشاركة ولو عجبكم الموضوع ادعولي ربنا يهديني ويوفقني لما يحبه ويرضاه

جزاكى الله خيرا

وربنا يهدى الجميع

شكرا لمرورك الكريم
نورت صفحتى

ربنا يوفقك
ميرسي يا عسل

منور بوجودك يا قمر

جميل والله

بجد موضوع رائع والله
وبردو مش هننسى انه هو كمان اخرته سوده
تسلم ايدك
وربنا يهدي جييييع الناس يارب

يااااااااااااااارب

امين