فاكر يا صاحبي زمان
أحلامنا ع البسطة
أحلام ملاك لملاك
كنت أفتح الشباك
ألقى الحياة خضرا
ألقى الوشوش نضرا
كنت ألقى سيدنا النبي
بيصافح العدرا
و مفيش فروق بينا
و لا في خطوط حمرا
فاكر يا صاحبي زمان
الصدق ف الكلمة
و الضحكة و الإحساس
و الحب معزوفة
و القلب حتة ماس
و النية معروفة
وقف الشيطان مذهول
هايب مصير مجهول
من حرقته قايد
لو شره كان زايد
فالطهر فينا أساس
حوالين رقابته .. لجام
فاكر يا صاحبي زمان
الصرخة تحت العلم
رفرف بدون جناحات
دقّة قلوبنا نشيد
سمّع سبع سماوات
مشاعرنا فرع رشيد
طارح بلح أمهات
بساتين كما الفساتين
مفصولة على جسمك
ناقشة حروف اسمك
برويها من عرقي
فيضان ف عز البرد
اسود دا طين الأرض
أحمر بلون الورد
أبيض .. جلابية
صلينا فوقك فرض
قاعد على قلبك
رافض قرار الطرد
و الغربة و الحرمان
فاكر يا صاحبي زمان
فرحتنا يوم العيد
و الإيد تهز الإيد
و القلب لسّه وليد
يدوب صمام و وريد
و اربع خمس ضحكات
فاكر يا صاحبي زمان
الفضفضة و الفضا
و النوم ف حضن الرضا
و البهجة حُكم القضا
نفّذها عود و كمان
فاكر يا صاحبي زمان
الضحكة كات بلسم
و لا رعشة و لا خضّة
و لا الدموع .. زمزم
ندعي و نتوضّى
طُهر و صفا و حنان
فاكر يا صاحبي زمان
و لا انت مش فاكر
شطرنج و عساكر
و الفرجة بتذاكر
حنموت فدا للملك
عطْشى ف حوض الري
مهما الطريق احتَلَك
شايفك ف أخره ضي
من وحشتي .. أُنسة
اوعاك ف يوم تنسى

تسلم الايادى

تسلميلي

ربنا يخليك ليا

جميل