ياعم يا بتاع الدستـــــــور ..

مين قاللك تدسترنــــــــــي



ياعم ده أنا راجل مغمــــور

ودستورك مشحورنـــــــــي



أنا لا بعمل انتكاســـــــــــة

ولا ليــا في السياســــــــــة



و لا عايز أكون زعيـــــــــــم

وهي دي الخلاصـــــــــــــــة



أنا مواطن ماليني الخـــــوف

لا بتعلم ولا عايز أتعلـــــــــم



ومبدأي دايما معــــــــــروف

لا بشوف ولا بسمع ولا بتكلم



ماتحزبنيش وماتجبرنيـــــــش

على حزب يا عمو ماينفعنيش



أحزابكوا يابا بكارنيه ونقابه

وناس بتوعد مابتوفيـــــــــــش




لا تقولي حزب وطنـــــــــــي

ولا حتى حزب الوفــــــــــــد


ولا إخواني وناصـــــــــــري

ولا ينفع حزب الغـــــــــــــــد


ياعم سيبني في حالي أعيش

أنا كل همي فـي لقمة عيــش


وهدمة تستر جسمي يانـــــاس

وأحزابكوا يابا ماتلزمنيـــــــش